Þessi veggspjöld þóttu ekki almenningi bjóðandi – Ert þú sammála?

Það er vanmetin listgrein að hanna grípandi kvikmyndaplakat. Flottustu veggspjöldin geta vakið upp mikla forvitni fyrir verkinu en um leið endurspeglað fullkomlega innihald þess. En veggspjöld eru vissulega notuð fyrst og fremst í kynningar- og markaðstilgangi og geta hönnuðir af og til gengið aðeins of langt.

Oft kemur það fyrir að plaköt eru gefin út án þess að framleiðendur eða hönnuðir hafi nokkra hugmynd um að farið sé út fyrir velsæmismörk, en eftir tvær, þrjár eða fimmhundruð kvartanir er kannski þess virði að endurskoða það sem afhjúpað var. Í slíkum tilfellum eru plakötin afturkölluð og sett á kristaltæran bannlista.

Hér eru ýmis dæmi um veggspjöld sem gengu hreinlega fram af bíógestum og fleirum.

Athugið að mörg þessara veggspjalda eru ekki við hæfi barna… sem gerir þau auðvitað meira spennandi.

MAN BITES DOG (1992)

Þetta plakat fyrir kvikmyndina Man Bites Dog þótti ekki sérlega dannað – af augljósum ástæðum.
Sennilega var snuðið fullmikið fyrir suma og var þetta rakleiðis tekið úr umferð.


SIN CITY: A DAME TO KILL FOR (2014)

Kynþokki selur en í Bandaríkjunum þarf að fara rétt að. Í tilfelli myndarinnar Sin City: A Dame to Kill For þótti geirvarta leikkonunnar Evu Green ekki alveg vera fólki bjóðandi. Ekki er þó hægt að saka plakatið um vörusvik í ljósi þess að Green sést á Evuklæðunum nánast alla myndina.


ZACK & MIRI MAKE A PORNO (2008)

Bandaríska kvikmyndaeftirlitið er heldur ekkert voðalega hrifið af því þegar ástaratlot eru gefin til kynna í kynningarefni. Ofangreint plakat fyrir gamanmyndina Zack and Miri Make a Porno var gríðarlega umdeilt vestanhafs (en prýðir enn DVD umslögin hér heima á Íslandi, þar sem enginn kippir sig upp við neitt – vei!). Leikstjóri myndarinnar, Kevin Smith, ákvað þó að svara gagnrýninni með töluvert mildari kynningarherferð og notaði þá þetta í staðinn…


SAW II (2005)

Þó að hér hafi verið um hryllingsmynd (eða pyntingarklám?) að ræða voru afsöguðu puttarnir aðeins of mikið af hinu góða. Í staðinn var ákveðið að gera málamiðlun og var þetta notað í staðinn…


TEETH (2007)

Plakatið við kóresku hrollvekjuna Teeth gefur tóninn við hverju megi búast þegar þessi sérstæða mynd sem fjallar um kynferðisofbeldi er sett í tækið. Líklega má finna hið undarlega verk á einni af þeim fjölmörgu streymisveitum sem bjóða upp á hin ýmsu undarlegheitum í kvikmyndaformi frá öllum heimshornum

Á vefsíðunni IMDB er kvikmyndin sett í flokk grínmynda, hasar og fantasíuverka. Mörgum þykir myndin dýpri en söguhetjan er ung stúlka sem glímir við sérstakt ástand, sumir lýsa því sem bölvun, aðrir sem flugbeittum líkamlegum yfirburðum.

Í nokkur skipti í þessari undarlegu hrollvekju er unga stúlkan í Teeth beitt kynferðisofbeldi. Allir þeir hrottar sem reyna að nauðga ungu stúlkunni hljóta bítandi örlög og svo gefum við ekki meira upp um söguþráð þessa sérstæðu myndar.


DICK TRACY (1990)

Kvikmyndin Dick Tracy segir frá samnefndum spæjara sem kallar ekki allt ömmu sína. Myndin skartar einvalaliði leikara í helstu aðal- og aukahlutverkum og bregður meðal annars Madonnu fyrir í eftirminnilegri aukarullu. Hins vegar þótti eitthvað voða vafasamt að gefa út sérstakt karakter-plakat þar sem kyntáknið fræga vísar í fornafn spæjarans. Undirtónar eru ekki alltaf velkomnir víst.


THE PEOPLE VS. LARRY FLYNT (1996)

Uppskriftin til að stuða bandaríska kvikmyndaeftirlitið felur það í sér að blanda saman föðurlandsást, kynlífi og trú í sama rammanum. Þess vegna kemur lítið á óvart að kvikmyndin The People vs. Larry Flynt hafi lent á radarnum, en annað væri ekki í stíl við sjálfan manninn sem fjallað er um.


THE GIRL WITH THE DRAGON TATTOO (2011)

Þið vitið hvað sagt er um (bíó)markaðsmenn og geirvörtur?

Æ, þið fattið.

Flott plakat samt.


THE OUTLAW (1943)

Þetta plakat fyrir kvikmyndina The Outlaw þykir sjálfsagt afar meinlaust í dag. Á fimmta áratugnum þótti barmurinn vera argasta klám samkvæmt Bandaríska kvikmyndaeftirlitinu.


THE ZERO THEOREM (2014)

Fjöldi fjölbreyttra veggspjalda voru framleidd fyrir kvikmynd Terry Gilliam, The Zero THEOREM. Eitt plakatið þótti afar undarlegt en það skartar leikaranum Christoph Waltz þar sem fókusinn er á afturenda stórleikarans. Þau sem þekkja ekki til þessa hæfileikaríka leikara sem á ættir að rekja til Austurríkis og Þýskalands. Walts á leikstjóranum Tarantino mikið að þakka sem treysti leikaranum fyrir einu af burðarhlutverka Inglourious Basterds árið 2009. Walts hefur bætt við hverri skrautfjöðurinni í hattinn síðan þá, en um þessa útgáfu af plakati Terry Gilliam er aðeins eitt að segja: Skamm!


SHAME (2011)

Kvikmyndin Shame segir frá kynlífsfíkli sem er túlkaður af Michael Fassbender. Segja má að myndin sé vægðarlaus og gefi opna og á tíðum truflandi sýn á líf fíkilsins. Áferðin á heiti myndarinnar á þessu plakati fór þó fyrir brjóstið á óskaplega mörgum. En ætli það sé augljóst hvers vegna?


BAD LIEUTENANT: PORT OF CALL NEW ORLEANS (2009)

Þetta (forljóta) plakat fyrir (hina frábæru!) Bad Lieutenant þótti einfaldlega ósmekklegt með öllu.

Líklegast vegna þess að Nicolas Cage horfði ekki í myndavélina.


BEREAVEMENT (2010)

Kennsla nr. 1 í plakatsgerð: Helst ekki leyfa barni að halda á eggvopni. 
Það pirrar krúttlega kvikmyndaeftirlitið víst. Allavega í Bandaríkjunum.


THE RULES OF ATTRACTION (2002)

Stundum þarf hvorki afsagaða útlimi né nekt til þess að fólki blöskri. Í tilfelli kvikmyndar eins og The Rules of Attraction frá árinu 2002 (kvikmynd sem snýst í grunninn um spólgröð ungmenni) var alveg nóg að ganga yfir strikið með krúttlegum leikfangadýrum í öllum heimsins stellingum.

Má ekkert??

Vel á minnst…


HOSTEL: PART II (2007)

Þarf nokkuð að segja?
Veit einu sinni einhver HVAÐ þetta er almennilega?


HANNIBAL (2001)

Nærmynd af Anthony Hopkins lítandi út eins og hann sé skorinn í framan er kannski ekki besta leiðin til að selja mynd um hrottalega mannætu…

Eða jú, það er bara VÍST rétta leiðin.

Étið ykkur, Kanar.


ALI G INDAHOUSE (2002)

Ekkert að sjá hér. Svona rúllar bara Ali G…


SPIDER-MAN (2002)

Fyrsta kitlan fyrir Spider-Man myndina frá 2002 sýndi atriði þar sem Köngulóarmaðurinn festir alræmda bankaræningja á milli Tvíburaturnanna. Þetta brot var gefið út skömmu áður en hryðjuverkaárásin þann 11. september átti sér stað og voru framleiðendur ekki lengi að kippa stiklunni úr umferð. Það sama þurfti að gilda um plakatið að ofan, en þar sjást turnarnir speglast í augum ofurhetjunnar og kom það að sjálfsögðu ekki til greina.

Talandi um 11. september…


TEENAGE MUTANT NINJA TURTLES (2014)

Við fyrstu sýn mætti halda að þetta veggspjald fyrir kvikmyndina um Ninju skjaldbökurnar frá 2014 sé afskaplega saklaust… innan gefinna marka. Við nánari skoðun þótti sprengja í skýjakljúfri fjarri því að vera smekkleg þegar frumsýningardagur kvikmyndarinnar blasir við þarna neðst…

Úps?

Ekki missa af...