„Þegar þau eru eldri þá eru þau búin að skaða æðakerfið“

Íslensk börn neyta meira af orkudrykkjum en jafnaldrar í öðrum löndum og séu langtímaáhrif af neyslu slíkra mikið áhyggjuefni. Þetta kom fram í kvöldfréttum Stöðvar 2 og segir þar að margt hvert barnið hefur þurft að leita á bráðamóttöku eftir neyslu orkudrykkja.

„Það eru yfirleitt svona örvandi áhrif. Þau eru kannski með hraðan hjartslátt og svona kvíða sem fylgir því að hafa svona mikið af þessum efnum í blóðinu,“ segir Curtis Snook, sérfræðingur í bráðalækningum og í klínískri eiturefnafræði á Landspítalanum. Curtis segir að hækkaður blóðþrýstingur sem fylgir mikilli neyslu orkudrykkja um langa hríð geti valdið skaða hjá ungmennum.

 „Þá ert þú að hækka blóðþrýstinginn á hverjum degi og púlsinn þá er í raun og veru kemur skaði í æðakerfinu fljótara í þeim einstaklingum sem gera það.

Það eru ýmis vandræði sem fylgir því að vera með háan þrýsting. Svo börnin myndu kannski ekki strax lenda í vandræðum en þegar þau eru eldri þá eru þau búin að skaða æðakerfið og þú ferð ekki til baka. Þú munt ekki breyta því.“ 

Fá drykki gefins

Matvælastofnun fékk áhættumatsnefnd á sviði matvæla, fóðurs, áburðar og sáðvöru til að rannsaka hvort neysla orkudrykkja, sem innihalda koffín, hafi neikvæðáhrif á heilsu ungmenna í framhaldsskólum. Nefndin skoðaði meðal annars hversu mikil neyslan er.

Niðurstöðurnar sýna að neysla íslenskra ungmenna á orkudrykkjum er töluvert meiri en sést hefur í erlendum rannsóknum. Þau ungmenni sem innbyrði mest koffín, innbyrði tvöfalt til fjórfalt það magn sem Matvælaöryggisstofnun Evrópu leggur til sem öryggismörk fyrir koffíninntöku fullorðinna, eða 3 mg/kg líkamsþyngdar á dag.

Ásta Heiðrún Elísabet Pétursdóttir, formaður áhættumatsnefndar og sviðstjóri lýðheilsu og matvælaöryggis hjá Matvís, segir að helmingur framhaldsskólanema drekkur orkudrykki og tíu tuttugu prósent þeirra eru að drekka þá daglega eða oftar.

Ásta Heiðrún

„Krakkarnir voru að segja að þau voru að fá þessa drykki gefins. Fjörutíu til sjötíu prósent sögðu að þau voru að fá drykki gefins í tengslum við íþróttir og hópastarf á meðan það voru tíu prósent framhaldsskólanema,“ segir Ásta.

Ekki missa af...