Íslenskur blaðamaður sagður líklegur til Pulitzer-verðlauna


Árið 2011 bárust íslenskum stjórnvöldum váleg tíðindi yfir hafið frá Bandaríkjunum. Yfirvofandi væri stórhættuleg tölvuárás á stofnanir og ráðuneyti hér á landi. Boðberinn var FBI sem bauð fram aðstoð sína til að stöðva harðsvíraðan hóp tölvuhakkara, fremsta á sínu sviði í heiminum, með sterk tengsl við Anonymous.

Gífurleg rannsókn sýnir fram á að boð FBI var blekking til þess að framkalla aðstöðu á Íslandi til að koma böndum á uppljóstrarasamtökin Wikileaks og stofnandann Julian Assange. Bjartmar Oddur Þeyr Alexandersson er blaðamaðurinn sem afhjúpaði þetta mál í ítarlegri umfjöllun Stundarinnar í júní á þessu ári, en fréttin vakti mikla athygli í heimspressunni en blaðamaðurinn sem umfjöllunina ritaði sagður vera efni í handhafa Pulitzer-verðlauna.

Bjartmar Oddur Þeyr hefur marga fjöruna sopið á rúmum þremur árum sem blaðamaður og hefur meðal annars unnið hjá Hringbraut, DV og er hann annar helmingur tvíeykisins á bakvið hlaðvarpsþættina Stóru málin. Í mars á þessu ári hlaut Bjartmar tilnefningu til blaðamannaverðlauna ásamt Frey Rögnvaldssyni í flokki rannsóknarblaðamennsku ársins. Tilnefninguna fengu þeir fyrir fréttaflutning af plastmengun í Krýsuvík sem var þar vegna dreifingar umhverfisfyrirtækisins Terra á moltu á svæðinu. Terra var valið umhverfisfyrirtæki ársins árið 2020.

Í umfjöllun Stundarinnar, sem gekk undir fyrirsögninni Blekkingarvefur FBI á Íslandi, er vakin athygli á því að Sigurður Ingi Þórðarson, sem einnig er þekktur sem Siggi hakkari, viðurkennir að hafa logið í máli gegn Assange. Sigurður Ingi er eitt af lykilvitnum í máli Bandaríska ríkisins gegn Julian Assange en Bandaríkin vilja fá hann framseldann til Bandaríkjanna, þar á hann yfir höfði sér allt að 175 ára fangelsi fyrir að leka leynilegum gögnum ríkisins í almenning. Sigurður sagði í samtali við Stundina að hann hafi logið í skýrslutöku vegna málsins.

Sigurður var á dögunum úrskurðaður í gæsluvarðhald í tengslum við rannsókn lögreglunnar á höfuðborgarsvæðinu á umfangsmiklum fjársvikum, peningaþvætti og skjalafalsi. Fjórtán til viðbótar eru með réttarstöðu sakbornings í málinu.

Aðrar reglur gilda

Edward Snowden, einn frægasti uppljóstrari heims, er á meðal þeirra sem deildi frétt Stundarinnar á samfélagsmiðlinum Twitter en hann er afar vinsæll þar, um 4,7 milljónir manna fylgja honum á miðlinum. Uppljóstrarinn er á þeirri skoðun að þessi frétt Stundarinnar tortími málinu gegn Assange.

Í viðtali við George Galloway, stjórnanda breska fréttaþáttarins Sputnik Orbiting Around the World, sagði Bjartmar frá tilurð málsins, uppfærðri stöðu og samskiptum við Sigurð. Segir Bjartmar að upplýsingarnar sem finna eru í ákæruskjalinu gegn Assange samræmast ekki frásögnum Sigurðar.

„Þetta er afar mikilvægt, vegna þess að vitnisburður hans (Sigurðar) er aðeins að finna í uppfærðu útgáfu ákæruskjalsins gegn Bandarísku ríkisstjórninni og Julian Assange. Í uppfærðu ákærunni er reynt að merkja Assange sem tölvuþrjót í stað fjölmiðlamanns, þar af leiðandi komast þeir upp með og ná að áfrýja sér undan hinu svokallaða “New York Times vandamáli,”“
segir Bjartmar og heldur áfram:

„Um leið og hann er málaður upp sem hakkari gilda allt aðrar reglur en væri um fjölmiðlamann að ræða… Hægt er að handtaka hann og þá á allt öðrum grundvelli.”

Calloway segir Assange-málið fljótt nálgast lokum og komi úrskurður á næstu vikum. Þá undirstrikar þáttastjórnandinn mikilvægi þessarar framvindu, að gæti þessi fréttaumfjöllun leitt til breytinga sem munu rata í sögubækurnar, gangi Assange aftur frjáls. Calloway veitir þó engan afslátt og segir:

„Ef Assange verður látinn frjáls, mun þessi fréttaumfjöllun þín verða söguleg. Ég vona að sé þér sé sama um orðalagið, en þú ert heldur óreyndur fjölmiðlamaður. Aðeins þrjú ár í þessu starfi, það er aldeilis stökkið,“ segir Calloway, en þá tekur Bjartmar undir og svarar:

„Já, þrjú og hálft ár í bransanum. Ég veit ekki, kannski hentar svona starf bara mér svona vel, “ segir Bjartmar og vísar í fyrri fréttamál sem hann tók fyrir þar sem Sigurður átti sök í máli. Þá grípur Calloway inn og segir:

„Annaðhvort er þetta byrjendaheppni eða blaðamennska sem mun líklega vinna Pulitzer-verðlaun. Mig grunar að það verði hið síðarnefnda.“

Viðtalið er að finna í heild sinni að neðan.

Ekki missa af...