Hroki, hræsni og grátur græðgispunga

Vilhjálmur Birgisson skrifar:

Mikið ofboðsleg hræsni er í þessu fólki en nú grenja sumir atvinnurekendur eins og stunginn grís yfir því að það hagvaxtaraukinn í lífskjarasamningnum komi hugsanlega til framkvæmda á næsta ári.

Núna sprettur t.d. Eggert Þór Kristófersson, forstjóri Festa, sem rekur ELKÓ, Krónuna og N1 fram og hótar að það séu bara tvær leiðir til að takast á við greiðslu á hagvaxtaraukanum það er annaðhvort að hækka vöruverð eða að fækka starfsfólki.

Hótun og hræsni

Að hugsa sér svona hótun en við gengum frá samningum sem kváðu á um að ef hagvöxtur á pr. mann fer upp fyrir vissa prósentu þá komi til greiðslu á hagvaxtaraukanum og nemur sú greiðsla frá 3.000 kr. til 13.000 kr. Nú vilja vissir atvinnurekendur ekkert fara eftir þessum samningum og hræsnin í þessu fólki ríður ekki við einteyming.

Nægir að nefna í því samhengi, að það kom fram í fréttum, að Festi hafi hagnast um 2,3 milljarða á árinu 2020 sem og að velta hjá Krónunni hafi aldrei verið meiri. Þá hafi hagnaður Krónunnar aukist um heil 22%.

Halló! Það virkilega meira?

Forsvarsmenn fyrirtækisins tala svo um að eina leiðin til að borga þennan hagvaxtaauka sem muni kosta fyrirtækið 300 milljónir, sé að reka starfsfólk eða hækka vöruverð.

Halló!

Festi skilaði ekki nema 2,3 milljörðum í hagnað. Ég tel því rétt að spyrja, er ekki nóg að hagnaður sé rúmir tveir milljarðar?

Þurfa þeir virkilega meira?

Krókódílatár Eggerts

Rétt að rifja líka upp að þessi sami forstjóri, Eggert Þór, sem núna grenjar eins og enginn sé morgundagurinn yfir því að þurfa hugsanlega að greiða fólki sem tekur laun eftir afar lágum launatöxtum fékk sjálfur fimm mánaða bónus árið 2019 og fóru árslaun hans úr 61,7 milljónum króna í 73,4 milljónir eða sem nemur tæpum 12 milljóna hækkun launa á ársgrundvelli. Mánaðarlaun hans hækkuðu úr 5,1 milljón í 6,1 milljón á mánuði.

Hroki, fyrirlitning og græðgispungar

Svo koma svona græðgispungar og væla yfir því að fólkið á gólfinu sem skapar arðinn hjá fyrirtækinu eigi hugsanlega möguleika að fá aukahækkun í formi þess sem samið var í lífskjarasamningum í formi hagvaxtarauka.

Mér sýnist að hroki og fyrirlitning sumra atvinnurekenda í garð sinna starfsmanna muni kalla á að launafólk skuli búa sig undir átök á íslenskum vinnumarkaði á næsta ári.

Vilhjálmur Birgisson er formaður Verkalýðsfélags Akraness og fyrrverandi varaforseti ASÍ.

Ekki missa af...