Eyjólfur í Epal segir íslenska hönnun ekki fá verðskuldaða virðingu

Eyjólfur Pálsson, oft kenndur við verslunina Epal, segir tíma kominn á að íslensk hönnun njóti sannmælis. Hann stendur því fyrir átaki með það að markmiði að vekja athygli á henni. „Átakinu er ætlað að gera fjölbreytileika íslenskrar hönnunar sýnilegan með auglýsingum á umhverfismiðlum um allt höfuðborgarsvæðið. Við birtum slíkar auglýsingar á mínútu fresti í heila viku,“ segir Eyjólfur og heldur áfram:

„Íslensk hönnun fær ekki alltaf þá athygli og virðingu sem hún verðskuldar og hef ég í gegnum tíðina reynt ýmsar leiðir til að koma henni betur á framfæri. Nú sem aldrei fyrr er mikilvægt að við öll, sem seljum, hönnum, framleiðum eða einfaldlega elskum íslenska hönnun, tökum höndum saman til að styðja við þessa mikilvægu iðngrein,“ segir Eyjólfur.

Eyjólfur segist hafa ástríðu fyrir hönnun sem nær langt út fyrir hans eigi rekstur. Því kemur hann ekki einn að verkefninu. Hann fékk Miðstöð hönnunar og arkitektúrs til liðs við sig og óskaði eftir að hún leggði til hugmyndir um fjölbreytta og fallega íslenska hönnun sem er nú þegar í sölu eða notkun.

„Úr varð ótrúlega fjölbreyttur flokkur hönnunargripa, um 60 talsins, sem varpað verður upp á skjái um allt höfuðborgarsvæðið. Hlutirnir á skiltunum munu spanna allt frá flothettum og fötum yfir í gistivagna, húsgögn og tölvuleiki,“ segir Eyjólfur. Hann bætir við að undirtektirnar hafi verið góðar.

Eyjólfur bendir á að Danir hafi verið klókir hvað þetta varðar. „Frændur okkar, Danir, leggja til dæmis ávallt áherslu á eigin framleiðslu og hönnun í stofnunum, byggingum, opinberum verkefnum og öllu kynningarefni, eins og í bíómyndum. Þetta gera Danir á hreinum viðskiptalegum forsendum en hönnun er einn helsti drifkrafturinn að baki aukinni verðmætasköpun, meiri lífsgæðum, sjálfbærni og betra þjóðfélagi.

Opinberar byggingar eru stolt þjóðar og eiga að endurspegla þann faglega metnað sem við búum yfir, bæði hvað varðar listmuni og arkitektúr en ekki síður hönnunarvörur,“ segir Eyjólfur sem bætir við að lokum að að brýn þörf sé á innkaupastefnu gagnvart íslenskri hönnun og framleiðslu.

Ekki missa af...