Eggert telur líklegt að reglur um skotvopn verði hertar: „Stoppa tökur, fjarlægja fólk, reka fólk“


Eggert Ketilsson, einn reyndasti kvikmyndagerðarmaður Íslendinga, gerir ráð fyrir að reglur um skotvopn í kvikmyndaiðnaði verði hertar. Gerist þetta í kjölfar atviksins í Nýju-Mexíkó á dögunum þegar stórleikarinn Alec Baldwin varð tökustjóra og leikstjóra að bana. Leikarinn taldi sig handleika óhlaðna byssu og gerðist þetta við tökur á kvikmyndinni Rust. Baldwin leikur aðalhlutverk og er framleiðandi myndarinnar. 

Eggert hefur marga fjöruna sopið í kvikmyndaiðnaðinum og unnið að myndum eins og Batman Begins, Prometheus, Interstellar, Rogue One og Tenet. Um þessar mundir er hann staddur við tökur á myndinni Desert Warrior í Sádí-Arabíu. Í kvöldfréttum RÚV sagði Eggert að vart sé talað um annað þar á tökustað en slysið.

„Allir voru mjög hissa að svona lagað gæti gerst í dag eftir allt sem búið er að gerast og ganga í gegnum í Bandaríkjunum, Evrópu, Íslandi og annars staðar í sambandi við reglur, lög og annað um skotvopn á tökustað,“ segir Eggert og vill meina að fagmennska hafi þarna á tökustaðnum verið umdeilanleg. Hann segir:

„Það virðist hafa verið einhver losarabragur á þessu. Það er fólk sem leggur niður vinnu og annað og það virðist ekki hafa verið tekið til greina og lagað. Ég bara skil ekki af hverju svona getur gerst.“

Talsmaður Baldwins sagði að um slys hafi verið að ræða en Baldwin hafi hleypt af skot­vopni með þeim afleiðingum að aðaltökustjóri myndarinnar, Halaya Hutchins, lést og leikstjórinn Joel Souza særðist.

Hutchins var flutt með sjúkraflugi á Uni­versity of New Mexico spítalann, þar sem hún var úr­skurðuð látin. Lög­reglu­stjórinn Juan Rios sagði leikarann hafa gefið sig fram sjálf­viljugur. Engin kæra hefur verið gefin út sem stendur.

„Mjög strangar reglur í þessu“

Eggert telur ólíklegt að Baldwin verði sóttur til saka, rannsóknin hljóti fyrst að beinast að yfirumsjónarmanni vopnanna. Þá segir hann að atvikið geti leitt til mikilla breytinga.

Greint hefur verið frá því að Hutchins hafi ásamt öðru starfsfólki krafist bættra aðstæðna á tökustað og að hópur þeirra hafi lagt niður vinnu um tíma vegna skorts á öryggi. Eiðsvarin vitni segja að aðstoðarmaður hafi afhent Baldwin byssuna með þeim orðum að hún væri óhlaðin.

Eggert segir reglurnar í faginu umfangsmiklar, að sé ströng skráningar- og geymsluskylda. Skoða þurfi vopn gaumgæfilega áður en þau eru tekin inn á tökustað og ekki megi beina byssu að manneskju. Þá þurfi að setja upp varnarbúr fyrir starfsfólk ef skjóta á í átt að myndavél. 

„Það eiga aldrei að vera hlaðin skotfæri á tökustað. Aldrei.

Þá þarf bara að stoppa tökur, fjarlægja fólk, reka fólk og stoppa þetta. Það eru mjög strangar reglur í þessu,“ segir Eggert.

Ekki missa af...