Benedikt furðar sig á Kára og segir óbólusetta beitta sama óréttlæti og gyðingar í Helförinni

Rithöfundurinn og sundgarpurinn Benedikt S. Lafleur líkir þeirri skelfilegu aðskilnaðarstefnu sem Gyðingar máttu þola í seinni heimsstyrjöldinni við þau óþægindi sem óbólusettir verða fyrir þessi misserin víða um heim. Benedikt tjáir sig í Morgunblaðinu og kallar það hina nýju aðskilnaðarstefnu og segir hana taka á sig „æ öfgafyllri og afdráttarlausari“ mynd. Benedikt vitnar m.a. í aðgerðir sem gripið hefur verið til í öðrum löndum, að meina óbólusettum að sækja opinbera viðburði og veitingahús.

„Þessi aðskilnaðar­stefna minn­ir óneit­an­lega á aðskilnaðarstefnu Þriðja rík­is­ins og í Suður-Afr­íku forðum,“ segir Benedikt og telur bólusetta smita í jafnmiklum mæli en bólusettir þar sem bólusettir gæti ekki að sér og séu kærulausari í samskiptum við samborgara sína.

Benedikt gagnrýnir íslensk stjórnvöld og sóttvarnaryfirvöld og sakar þau um að herja á fatlaða, börn og gamalmenni með endalausum bólusetningaáróðri. Þá fær Kári Stefánsson, forstjóri Íslenskrar erfðagreiningar sinn skerf af gagnrýni. Benedikt segir:

„Þótt við Íslend­ing­ar höf­um enn sem komið er ekki gengið jafn langt í hinni nýju aðskilnaðar­stefnu hafa sum­ir hér á landi tekið und­ir hug­mynd­ir í svipaða veru, þar á meðal Kári Stef­áns­son hjá Íslenskri erfðagrein­ingu, sem lagði það á sig að leit­ast við að upp­ræta gyðinga­for­dóma skák­snill­ings­ins Bobbys Fischers.“

Þá telur Benedikt að lýkur séu á að í fyllingu tímans muni verða færðar sönnur á lélega virkni og jafnvel skaðsemi bóluefna. Væri rithöfundurinn og sundgarpurinn heilbrigðisstarfsmaður eða stjórnmálamaður myndi hann láta sem flesta njóta vafans.

„Skipu­lögð út­skúf­un þeirra sem ekki treysta í blindni bólu­setn­ing­ar­her­ferðum þeim sem nú standa yfir gegn Covid-19, sem þar að auki hafa ekki enn sannað gildi sitt til fulln­ustu, ætti aldrei að verða örþrifaráð neinna vald­hafa. Hvorki hér né ann­ars staðar. Fyrr né síðar,“ segir Benedikt að lokum í grein sinni sem birt er í Morgunblaðinu.

Í sama blaði er viðtal við Þórólf Guðnason sóttvarnarlækni sem segir kúrvuna „mjakast niður“ en gangi hægt. Þá segir Thor Aspelund, prófessor við Háskóla Íslands, að þriðji bóluefnaskammturinn veiti fólki 90% meiri vörn gegn veirunni en það hafði áður fengið með öðrum skammti.  

Um 25 þúsund manns hér á landi yfir 12 ára aldri eru óbólusettir.

Ekki missa af...